mavi
22222222233333333
 
دكتور-عياد banner

BT Facebook LikeBox

Friday, 09 February 2018 08:20

حلها يا مختار!!

كتب بواسطة : 
Rate this item
(0 votes)

محمد السقار

ابوي يا إخوان ميت إله حوالي ١٥ سنة -٢٠٠٣ ١٧ رمضان 
ابوي كان رجل يجمع بين النقائض ... مثلا كان مختار و بنفس الوقت بسيط كان عنده محل خضرة و فواكه للدراويش ...بمرات كنت اختلف معاه و اقله يا والدي ليش ما نجيب مثل فلان و علان ... يعني طرد خفيف و ربحه عالي ...يقلي يابا و هذول مين يجيبلهم?!! ابوي كان بضاعته تفاح بسيط دراق بندورة و شغلات مش موجودة بالسوق و بعمره ما شكى من خسارة ولا انكمش اقتصاديا بالعكس 
دفاتر ديونه مليانة و راس ماله ثابت و زباينه بازدياد 
بنفس الوقت الله يرحمه كان ذارب صحبة غير شكل مع المصري الختيار اللي بشتغل عامل نظافة بالسوق و تيجيه عزيمة للشي لابسين العبي المقصبة و يرفضها ...!!!اقله يا والدي كويس الناس تتذكرك بالخير و تدعيك لاكبر مجالس ...كل مرة يقلي يابا عندي سروة بكير. ماليش عالسهر ...!!!!بيوم من الايام مرض ابوي و كنا بالمستشفى .... و اذ بواحد مستنوب مر بجنب غرفتنا و فات وصار يعرط ... ايه والله ما بدري انك هون يا مختار ... شو رايك ننقلك عالمدينة الطبية ...اللي لاحظته ابوي مطنشه و بزت بالحكي معه زت و واضحة العملية 
الغريب قبل شوي ابوي كان كله نشاط لما اجا عامل النظافة المصري و كان يمزح و يلعب 
فلسفة ابوي بالزهد كانت غريبة و مبالغ فيها 
مع اني داخليا كنت انبسط كثير لما اشوف شعبيته جارفة و خصوصا عند الدراويش الطفرانين ..!
مات ابوي الله يرحمه ولا زالت الناس و لله الحمد بتذكره بالخير ... الغريب بعد سنوات و اقسم بالله العظيم لقتني عجوز كانت زبون درويش دائم عند ابوي قالتلي اعطيت ابوك صوتي بالانتخابات البلدية كون انه انطرح اسم ابوي كمرشح لفترة و بطل ابوي ...العجوز لانها امية ما بتدري انه ابوي اترشح لمدة بسيطة و بدورة انتخابية سابقة و بسبب مشاكل داخلية ابوي بطل و فكرت انه بنزل كل مرة ..!!!ضحكت و قلتلها يا خالة ابوي مات ..و تركتها و. رحت ..ابوي يا إخوان كان يجمع بين التواضع مع الازغار و العظمة و الشموخ مع الكبار و كان غريب بحيث كان عنده لمسة حنية مع الغريب و شوية قسوة علينا بس بحياته ما حرمنا من شيء 
لما مات و اجانا اضعاف ما اتوقعت من المعزيين عملت مثله كشرت يوجه اصحاب العبي و ابتسمت للطفرانين 
اليوم اجا ببالي المختار الله يرحمه يمكن روحه اشتاقت لدعائي او يمكن انا اشتقتله 
ابوي كان مدرسة صامتة و ما كان يحكي كثير ...ابرز انجازاته البسيطة ... مزع دفتر ديون كان فيه حوالي الف دينار ديون .. اختنقت و سالته ليش هيك يابا ...قلي يابا ما عاد شفتهم .. معهمش يسدوا و خجلانين يجوا ...خليهم يجوا يوخذوا و بالناقص عالقديم ... اشتقتلهم يابا كانوا عاملين حس للمحل!! 
وينك يابا ... انت كنت ماشي ع مبدأ افتح قلبك لكل قلب ستجد قلبك بكل قلب 
يابا لما اجيت اقلدك ...فاتو كثير ع قلبي و في منهم طلعوا المحترمين و اولاد العالم استحوا لما طولوا و طلعوا و ما ظل بالقلب يابا الا الحرامية و المصلحجية ...!!!!وينك يا مختار تحل هالقضية 
اخواني الرجاء كل الرجاء الترحم فضلا لا امرا و شكرا ....!

تمت قراءة هذا المقال 521 مرات اخر تعديل للمقال Saturday, 10 February 2018 06:12

قائمة التعليقات  

 
#1 أم بشار 2018-02-09 09:42
الله يرحمه ويسكنه فسيح جناته
 
 
#2 هاشم الخشمان 2018-02-09 10:15
الله يرحمه ويرحم امواتنا واموات المسلمين اجمعين
 
 
#3 الغالي 2018-02-09 10:24
الله يرحمه و يحسّن اليه
 
 
#4 نكوش 2018-02-09 14:14
الله يرحمه ووالدينا وجميع اموات المسلمين

ما عرفنا قيمتهم الا لما رحلوا والي بعده بنعم بريحة ابوه وامه ارمي وجهك على اقدامهم لانه ريح يجيك يوم تتمنى تشم ريحتهم

الله يرحمك يا والدي ويحسن اليك الله يرحمك يا والدتي ويحسن اليكي والله ما طابت الدنيا بشيء من بعد رحيلكوا
 
 
#5 د. المعتصم أحمد الدرايسه 2018-02-09 14:57
أسلوبك رائع وينبض بالحياة ويعكس الكثير من القيم والأخلاق الانسانية التي بدأنها نفقدها رويدا رويدا....رحم الله والدك ووالدينا وجميع أموات المسلمين.
 
 
#6 ابو جلال ابو عراق 2018-02-10 06:54
الله يرحمه رحمة واسعه ويرحم والدينا وجميع اموات المسلمين اللهم امين كان كل واحد منهم مدرسه ديننيه اخلاقيه اجتماعيه
 

تذكر دائما قول الله تعالى : مَا يَلْفِظُ مِن قَوْلٍ إِلا لَدَيْهِ رَقِيبٌ عَتِيدٌ